Jea bolon

Taon 90-an nang sahat tu tingkion, tung mansai jotjot do tabereng masa marjoker di parpunguan ni halak Batak. Molo di arisan, olo do dang pola dipatupa nasida partangiangan, asa pintor boi hatop mulaan na marjoker on. Holan sae mangan nunga pintor adong na mamulai marhaliang. Molo songon na hurang dope halakna, olodo tanpa sadar dijou parsimatuaonna asa dohot, "amang, tuson hamu, ai hurang dope kaki on" ninna, jala sering do nasida marmeam sahat tu tonga borngin.
Adongdo punguan na biasa hian patupa partangiangan di arisan, alai ala ni hobbi ni torop anggota marjoker, olo do sipata didok tu nanaeng marjamita, "na hatopi ma baen hamu, holan jaha hamu ma ayati, ai nunga marminggu nangkanin" ninna, hape belum tentu sian gareja nasida, asa pintor boi do dirohana hatop mulai namarhaliangon.
Tarlumobi molo adong na sorang, pintor las do rohana, ai adongma dalan lao marjoker ganup borngin. olo do sipata, saminggu do biasana tikki ni namelekmelekan alai anggo angka parhobbi jokeron,olo do didok, "sabulan ma tabaen ate" ninna. Alai apala naukkebatna, akka parhobbi on gabe songon mata-mata do nasida, nunga sai diberengi keluarga ni isema nanaeng dapot haroan. Nunga dibaen nasida jadwal melekmelekan
"bulan na ro di jabu ni aman Togap ma hita, ai hubereng hipas nama nasidai" ninna tu donganna, "bulan na ro nai muse, dijabu ni aman Timbul ma, ai parjolo dopei hubereng sian aman Jamot" ninna muse.
Alai adong dope namasa ditikkion, dang alani punguan manang ala na sorang dakdanak be nasida marpungu, nunga dibaen nasida parpunguan rutin antar keluarga,ama dohot ina rap marjoker jala marganti-ganti nasida lao manjabui jala olo marborngin. Dimulai nasidama malam minggu olo ma sahat tu minggu malam. Gabe akka ianakkonna pe ditinggalhon ma dijabu, molo adong pangurupina ba dipasahat tupangurupi lao mangurus, molo dang adaong laos dikuncima ianakkonna dijabu masiurus dirina be.
Adongma parpunguan rutin parjoker songonon nahea binereng, ia keluarga na marmeamon tolu keluarga jala akka namartutur dope nasida. diatur nasidama parhundulna jala topet adongma inang baona hundul di sabola siamun ni amang baona. Mulai ma nasida na marmeam on, jala nunga adong be na talu. Nunga mulai adong na gogo soarana, dang dipardulihon nasida be akkka namartutur. Tep ma disada tikki, pintor didok amantaonma "ah, nunga masuk au bah," ninna huhut mekkel amantaon. Tanpa disadari inang baona na siamunnai, didok inantai "ai dia do amangon, sonanggo tahan dope iba nunga dipamasuk ninna" gebe mekkel nasida sude umbegesa.
Ima jea ni na marjoker, habis tikki dang marlapatan, habis hepeng songon na tinakko, dang adong be tikki lao mangurus ianakkon, holong namarkeluarga pe lam humurang, jala olo silap makkatai tu akka subang ni tutur. Alani dihamu amang, inang tinggalhon hamu mai parjokeroni, pasuda-suda tikki doi, pasuda-suda hepeng, dang adong gunani, tajalahima ulaon namarguna, dihita, dikeluarganta nang nahumaliang hita. horas.

Namar bao

Niingotma ditikki dihuta iba, najolo apala sian samping ni jabu nami adong do dalan lao tu sada huta goarna huta Sibadak. Molo lao manggiling eme nasida tu aek rangat on do nasida ro, ai dang adong dope gilingan padi di hutai najolo. Manang molo naeng lao tu onan sai jotjot sian samping ni jabunamion nasida mardalan. Jala olo do jolo digadis nasida angka nabinoan nasidai, dipinggir dalan apala dijolo jabu namii. Ikkan mas sian hutaon terkenaldo ala ni tonggina, dali ni horbo pe tung mansai godang do ro sian hutai, tarlumobi honas natonggi-tonggian siani.Ia huta on daerah perbukitando, alani pe dalan sidalanan marnakkok tuat. Angka dongan na sian hutaon molo lao marsikkola, sogot manogoti nunga borhat nasida, tung alani do jogi-jogi do angka dongan nasian hutaon marolahraga. Molo ari sabtu masa ma onan dipasar Tarutung (ai holan sahali saminggu do onan najolo). Sude do halak lao tu onan lao manuhor akka haporluan ni keluarga untuk saminggu. Nang nasian huta on pe tong do songoni, Tuat ma nasida marudur udur sahat tu aek rangat, sian ima nasida marmotor lao tu Tarutung. Najarang dope halak nampuna kareta najolo mardalan pat dope namasa. Adongma sahalak inanta, nunga botari ibana mulak sian pasar, sude donganna sauduran nunga mulak parjolo. Nang pe lungun-lungunan inantaon, tong nama ditaonton mardalan sahalakna. Alai dang dao dope inanta i mardalan, sian pudina ro ma sahalak ama markareta, sai diparrohahon amanta on dao dope sian pudi, "halak inang bao"ninna rohana,"molo holaosi dang suman, alai molo boncengonku boha ma nuaeng" ninna rohana muse. Nunga lam jonok amantaon, ujungna gabe ditogihon amantaon ma inanta namardalani, "Beta hamu inang, rap ma hita"ninna. "Bah halak amang bao" ninna rohana, "molo hudalani sahalakku, habornginan ma au annon, alai molo dohot au, behama pandok ni jolma" ninna rohana. Alai ala nunga so amang baona on, gabe dohot ma inanta i di bonceng, dibahen ma belanjaanna dijolo ni amantai. Dung hundul inantai, mardalan ma nasida, goarna ma namarbao, makkatai pe sahali-sahalido jala ikkon sopan do. Sai tupudi ma tanganni inantaon maniop bosi-bosi ni boncengan i, asa unang sai dais dirohana ibana tu baonai gabe hantoran ibana. Alai ala dalan namarnangkok tuat i, sipata dihonjor ma baonai tujolo molo tuat-tuatan dalani ai antar liccin muse do hundulan ni karetai, gabe di tanki bensin inama baonai hundul tanganna pe gabe sai bekkuk maniop stang ni karetai. Sipata runsur ma amang baonai tupudi molo nakkok-nakkohan dalani, jala inantaipe lam mundur tupudi hundulanna gabe sipata olo naeng madabu inantai ai nunga di bosi-bosi na tiniopnai ibana hundul. Dung sahat nasida dihuta, mekkel ma akka donganna sahuta marnida nasida. Gabe bingungma amanta, nang inantai. Ai boasa nuaeng diparekkeli halakon hami, ninna rohana. Hape dibereng inantaima, amang baonai nunga hundul di tanki bensin ni karetai, jala ibana sandari pe hundul nunga tung mancai disosak ibana baonai tu jolo, gabe pintor tuat ma inantai, lam margak ma akka dongan sahutanai. "Alani hamu do i, boasa tinggalhononmuna sasada au," ninna inantai, lam margak ma nasida marnida inantai namaila-maila huting.

Sijamila

Adong do sada kebiasaan ni hita Batak na maol di roba. Tung mansai maol do mendisiplinkan diri taringot tu partingkian. Nunga dibahen boa-bao partangiangan mulai Pkl. 19.30 teng, alai sai tong dope godang natarlambat,(memang tung mansai terkenal do jam karet ni halak Batak) jala ujungna dipartangiangan na mangihut, baru pe dimulai molo nunga torop na ro. Di namangapuli, nang ditingki na besuk pe,masa do na songoni. Nunga marjanji nasapunguan arisan asa pajumpang di RS Pk. 17.00 "ala waktu jam besuk na terbatas, asa tepat waktu ma hita" ninna pengurus. alai otik dope naro di jam naung tinontuhon i, ujungna olo ma gabe marungut-ungut dongan na parjolo sahat, ai gabe gumodang tikki nasida paima donganna, sian tikki na besuk. Diparmingguanpe tong do adong na songoni. Di Gereja nami molo minggu siang, masuk pk.10.30, harusna nunga cukup tikki di angka dongan lao marhobas dijabu asa unang pangkuduson lao tu gareja. Nadi ari minggu i, Nunga hohom di bagas joroi, ala nunga manjaha votum amang sintuai. Alai pintor gitikma tu pinggol soara ni sipatu namallatak-latak mardalan sian pudi tu hundulan ni punguan ina di jolo. Pintor guga do konsentrasi mambege suara namallatak-latak i, tanpa sadar gabe ni serbengma dompak hundulan ni punguan inai "ai ise doi" ninna roha. Tanpa rasa sungkan pintor dihusip ma donganna asa digeser saotik asa boi ibana hundul, jala tanpa rasa bersalah jongjong ma inantaon satokkin alai pintor hundul muse, jala dibuat suri/sisir sian tas na, laos marsisir tikki i, dung sae marsisir jongjong muse ibana ("amang tahe inantaon",ninna roha dibagasan) . Napasti akibat ni haroro ni inantai tuparmingguan nunga mambahen mago songon na niullus ni alogo hahomion di parmingguon i, alai nunga gabe sitonduran ni angka namarminggu i inantai tarlumobi na dipudina mambahen mago konsentrasi ni dongan na sedang marsomba tu Tuhan i.
Tujuanta lao tu bagas joro nalao mamuji Tuhani do, sian jabu pe nunga tapersiaphon dirinta asa unang tarlambat, asa unang mangganggu acara parmingguon i, jala sian parmingguon i, gabe dapotan bohal ni partondion ma hita lao patoguhon rohanta, mangajari hita, songon dia ma hita besrsikap lao mangadopi angka naneng masa dingolunta tujoloan ni arion. Alani dihita halak batak na sai olo dope dang disiplin di partingkian, asa tapaubama i, ai olo do holan ala ni i, gabe sisurang hita di parsaoranta siganup ari, dipunguanta, dihurianta tarlumobi gabe mambahen dongan targanggu, gabe mambahen losok rohana marsaor dohot hita. Tung mansai godang do harugianta molo dang disiplin hita dipartikkian, dang holan dirinta sandiri, alai dohot do nang angka donganta rugi, alani tapaubamai.

Na mate gabe mangolu
(sumber P`Ringo)

Tung mansai ngot-ngot do rohani hita jolma molo marsirang hita dohot na tahaholongi ala ni hamatean. Tung alani do dihita halak Batak, (nangpe bohi seram alai perasaan halus do) pintor laho do melayat molo diboto adong namonding. Disada tikki adongma sahalak ama namonding di huta nami, nunga sidung be diula taringot tu ulaon adat batak hombar tu namonding. "Ala nunga sae be ulaon adat, saonari hupasahat hami ma tu pangula ni huria" ninna protokol ni hasuhuton ma.
Angka keluarga natininggalhon ni amantaonpe, pintor mangangguk bobar muse, ai on nama hape parpudi bereng nami bapaon ninna rohana. Ala naung pinasahatna tu huria, ba roma antong pandita dipakke ma baju jubahna on, mardalan mandapothon batang ni namate i, tung tongamma antong berengon. "Asa tapatupa ulaon huria, pasonang hamu ma rohamuna" ninna pandita on. Marende ma hita ninna sintua, "Sai masipaidaan do.." mardalan ma jojor ulaon nahombar tusi,jala dung sae, dipasu-pasu panditai ma, jala dung sae laos di pamasuk tu sakkuna mig na so markabel i, di uluhon sintua ma muse marende "Loas au asa lao au" huhut di tutup boruna ma batangna i, laos dipakku, di tuhuk nasida dipamasuk tu mobil ala dao do TPU . Biasana adong do mobil di sediahon hasuhuton lao mamboan pandita dohot rombonganna. "Sianonnma hamu amang pandita nami" ninna hasuhuton, ia mig nangkin tong dope disakkui panditai, alai wareliss na dang diboan, ai lupa baruni hasuhuton mamboan tu kuburan. sahatma di kuburan, nunga pungu be jolma disi jala batang i pe nunga dipaturun tu kuburani, dibuat pandita onma mig sian sakkuna, dites pandita i pangoluhon, "Ai boasa dang mangolu be on" ninna pandita i, hape pintor adong mangalusi sian pudina "Ai na boha do panditaon, sian dia do boi namate gabe mangolu" ninna. Pintor tompu ma di alusi panditai "Mig on do na hudokkon" ninna, gabe mekkel akka jolma na disini, apala naung geokna ala tinggal di huta warelisnai, gabe dihuta tarbege soara ni pandita i. Horas....